नेपालगन्ज- , वैशाख २० - अनिश्चितकालिन आम हड्तालमा सहभागी हुन नेपालगन्ज आएका करिब तीन सय आन्दोलनकारी बिरामी परेका छन् ।

धुलो, चर्को गर्मी र जथाभावी खानपिनले उनीहरु बिरामी परेका स्वास्थ्यकर्मीहरुले बताएका छन् । 'तीन सय जतिको प्राथमिक उपचार गराएका छौ'-माओवादी बाँके सह-इन्चार्ज आईपी खरेलले भने,-पेट, टाउको दुख्ने र झाडापखलाका बिरामी धेरै छन् ।

आन्दोलन परिचालन कमिटीले परिचालन गरेको प्राथमिक उपचार टोलीहरुले उनीहरुको उपचार गरेको थियो । तीमध्ये २६ जनाले भेरी अन्चल अस्पतालमा उपचार गराएका छन् । अहिले ६ जना आन्दोलनकारी अस्पताल भर्ना छन् । औषधि सेवनपछि अधिकांश बिरामीको स्थिती अहिले सामान्य रहेको खरेलले बताए ।

अस्वस्थकर बसाई र दुषित खाना तथा पिउनेपानीका कारण आन्दोलनकारीहरु बिरामी भएको हुनसक्ने भेरी अन्चल अस्पतालका प्रमुख डा बिमल ढकालले बताए । 'गर्मीको बेला छ । खानपिन र बसाईमा ध्यान दिनुपर्छ'-उनले भने ।

नेपालगन्ज र वरपरका ५० भन्दा बढी होटलहरुमा सयौ माओवादी कार्यकर्ताहरु दुखजिलोसंग बस्दै आएका छन् । उनीहरुलाई त्यही बस्ने र खाने व्यबस्था मिलाइएको माओवादीले जनाएको छ ।

नेपालगन्जमा गर्मी र लामखुट्टे बढेकाले आन्दोलनकारीहरुले कष्टकर रात काटने गरेका छन् । बिरामी पर्न थालेपछि केही आन्दोलनकारीहरु घर फर्केका छन् । कतिपयले आमसभाका लागि ल्याएर नफर्काएर आफूहरुलाई अलपत्र पारेको गुनासो गरेका छन् source: kantipur online